نجوم الفن يناشدون شيرين عبد الوهاب “السكوت” في قضيتها مع عمرو دياب

متابعة –الجورنال
بعد التصعيد المتعمد من شيرين عبد الوهاب لأزمتها مع المطرب عمرو دياب، تراجعت قليلًا تعليقات الإدانة من نجوم الفن المصري، ليحلّ محلها مناشدات واسعة للمطربة المصرية بالتزام السكوت، وعدم التفكير ولو حتى في الاعتذار، ورأى بعضهم أنّ كل كلمة تقولها شيرين حاليًّا، تمثّل إهانة شديدة للفن المصري ورموزه.
الشاعر بهاء الدين محمد قدّم نفسه كطرف محايد بين الهضبة وشيرين، واكتفى بقول كلمة “كفاية” للاخيرة، مؤكدًا أنه حتى الاعتذار لم يعد مقبولًا منها، وقال: عزيزتي شيرين عبد الوهاب.. أنا بعزك ودافعت عنك كتير.. وفي نفس المكان اللي دافعت عنك فيه لحظة خلافك مع الفنان الملحن عمرو مصطفى.. لازم دلوقت أقولك لأ .. وكفاية .. وصمت”.
وأضاف بهاء: “عمرو دياب كيان كبير ومن الصعب تكراره .. ده غير إنه واجهة لينا وللوطن العربي كله .. وحتى لو حصل خلاف معاه لازم يكون بشكل لائق وغير معلن.. لأننا بالفعل عمرنا ماسمعناه ولا شوفناه بيغلط في حد أو زميل.. ده غير إن ماحدش فاهم ولا عارف هو عملّك إيه.. وانتي والكل عارفين إني أكبر وأصدق من إني أجامل أو أنافق حد فيكم.. علشان كده لازم أقولك كفاية يا شيرين، وخلّي بالك وماتخسريش جماهيره اللى تجاوزت 90 % من المجتمع العربي ويمكن أكتر.. والمطلوب منك الصمت، لأنّ الوقت مش وقت اعتذار!!
الممثل وليد فواز رفض ما يردد البعض عن حاجة شيرين لمن يعلّمها أصول الكلام، مؤكدا أنها تحتاج من يعلمها فضيلة الصمت، وقال: شيرين أجمل صوت في العالم العربي دلوقتي ودي شهادة حق.. وأنا مش موافق أنها محتاجة حد يعلمها تتكلم.. هي محتاجة حد يعلمها تسكت!!
الفنان والسيناريست عمرو محمود ياسين، طلب من اصدقاء شيرين التدخل لانقاذها من نفسها وقال: ماكنتش عايز أتكلم عن الموضوع ده، بس مش قادر من الآخر كده الناس لها الظاهر، إحنا مش بنضرب الودع، عمرو دياب هو نجم مصر والوطن العربي وقصة نجاح تُدرّس، والموهبة لوحدها مش كفاية أنّ تصنع نجمًا أو نجمة، والهرتلة والعبط آخرتهم وحشة!!
الناقد طارق الشناوي طالب الجميع بتجاهل كلام شيرين عبد الوهاب والتركيز على أغنياتها فقط، مؤكدًا أنّ كل كلمة تنطقها خارج الغناء تسحب من رصيدها الفني الكثير!!
شيرين نفسها قالت للشعب التونسي لو كلامي على المسرح بيزعلكم حسكت خالص .. فهل تلتزم بقرارها وتصمت؟

مقالات ذات صله